يوميات فهميني و دوقيني : كيفاش ديري بلاصطك فالخدمة ؟

صباح الخير و الخميييير

يوميات فهميني و دوقيني : كيفاش ديري بلاصطك فالخدمة ؟

هادي سيريا جديدة بمواضيع قريبة لينا، كل مرة غادي نهضرو فموضوع كايهمنا كاملات…ويلا عندكوم اقتراحات مرحبا بيها..

فكرت بزاف وگلت الموضوع اللي غادي نبدا بيه غادي يكون كايهدر على واحد الخلفية ديال الخدمة فالمغرب وما ادراك ما الخدمة بحكم اننا دزنا كلنا من داك البيزوطاج ديال جوج دريال من اللي خايف تشدي ليه بلاصطو،  ومن اللي مخدمك غي باش تخدمي خدمتو وياخدها من بعد على اساس انها خدمتو، ومن اللي يالاطيف حاسدك من وعلى والو، ومن هاداك اللي باغي فيك الخدمة، وزيد وزيد …

ماغاديش نگوليكوم راني خيّاخت فالخدامي، التجربة ديالي مازال فريشك ولكن شفت من جميع الالوان مع جميع الاجناس، من كحل الراس لليهودي والنصراني.

نجيو الموضوع باراكا من الدّخول والخروج فالهدرة…

يالالة نهار مسعود ملي سنيتي الكونطرا ديالك، خاصك ديري فبالك دابا (من غير دّيري خدمتك على حقها وطريقها) باللي غادي تكوني ديك « البلارة » اللي كولشي باغي يعرف عليها كولشي (علما ان النيڤو ديال التبرگيگ كايزيد مع النيڤو د الپوسط الجديد ديالك).

أولا :  

وايّاك يزغْبك الله ديري فيها « انا هيا الپاطرونة »، خليك « مستمعة » كيف كانگولو، شوفي، ركزي، برگّي، حلّلي، و سمعي فقط ومتنسايش « البتسامة » مهمة بزاف بيها كاتصيفتي مساج ديال  » الجو ديال الخدمة زوين » حيت كوني على يقين الاسبوع الاول ديالك وصل عند الپاطرون فمزيان يوصلو بلي عاجبك الحال فالخدمة باتش حتى هوَّ يهنينا.

ثانيا : 

اكبر غلطة (خاصة فالشركات الكبيرة) هي فاسبوعك الاول دّيري مجموعة ديال رفاق الخدمة (ليزامي)… خاصك تكوني مع كولشي خاصة فالايام الاولى حتى تعرفي وتفهمي الجو دْ الخدمة كيف غادي، وشكون صاحب شكون، وشكون مخاصم مع شكون باش ماتكونيش فموقف لا يحسد عليه وتّبْصم عليك… الارشيفات مهمين لضمان استقرارية على المدى البعيد  😅

تالثا : 

السّياسَة المسُوْسٓة : ااااااه احْنِينتي، ما تنسايش راكي جديدة « البلارة » وكلشي حاضيك وباغيك تكوني ودنيه، خليك زوينة مع كولشي ما تدي الهدرة ماتجيبيها خلّيها تحبس عندك و ديري راسك ما شفتي، ماسمعتي، شعلي المود (ايّه ايّه لاّ لاّ ديسكري زعما)  وغادي تهني راسك… تقي بيا. طبعا الخدمة ديالك خاصها تكون من داكشي… وَإلا غادي تسماي جايّا تجْمّعي ( كحل الراس كيفما درتي معاه وحلة…)

رابعاً : 

ماتكونيش « شَّبح » فالخدمة، ديما الإبتسامة فالصباح و العشية… و دائما « بونجوغ » و « بونصواغ » فالدّخلة وْ الخْرجة، وخّا تكون طالعة ليك القردة… ماتنسايش، كاين ديما اللي كايدي الهدرة لپاطرون، فَ خلّيهوم يگولو ديك السّيدة ملي كاتجي الخدمة كاتنسا كولشي و مزيانة مع كولشي… وكاتگول السلام ( اااايِّه كاين اللي ما عندو شغل و حاضي غير هاد الهبال فالخدمة… الله يستر و ردي بالك) 

ملي دُّوزي الشهر الاول (على سلامتك بعدا) غادي تكوني درتي فكرة شاملة على الخدمة اللي كاتسناك و خاصة على « لي كُوليگ » ديالك فالخدمة. ف خليك ذكية والله يخرج سربيسك على خير 😎

اِوى وْ نتومى اللِّي خدّامات، كيف دازو الايام الاولى ف سربيسكوم ؟ 

1 Comment

  1. zineb 19 janvier 2016

    انا غير كنقرا فلاكاك وياختي اكتر من الخدمة بنفسها هههه شي حاضي شي انا النهار الاول كندير فيها انفيزيبل مكندوي ماكنتكلم و كنبقى حاضية شكون اللي كيجاوب شكون لي باينة فيه قراي شكون لي ضريف باش نختار الاصدقاء تاعي و السيمانة الاولى كيبدا يبانو ليك الاحزاااب ها الحزب المعارض ه الحزب المنافق ها الحزب الى اخره… المهم اختك كلشي كيبد يقول عليها معقدة حيت مكانتسرعش ونختار الاصدقاء و كيبداو صحابات نقل الاخبار يجيو ويعرفو اش تحت راسك وكيجيوك عروض الصداقات و كنختار الفرقة الرابحة بطبيعة الحال هههههه و لي كنبقى معاها حتى لاخر عام فلافاك هههههههه وهده هي حياة الطلبة

    Répondre

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *